Waar is ons nou? Die ondervindings van kinders van Nederlandse immigrante in Suid-Afrika

"Waar is ons nou?" is geskryf na jare se wonder oor hoe ander mense wat as kinders na Suid-Afrika gekom het, die ervaring beleef het, veral gesien in die lig dat soveel Suid-Afrikaners se kinders en kleinkinders die afgelope paar jare ge-emigreer het. 'n Kind is waarskynlik aanvanklik nie bewus van die implikasies wat so 'n stap in sy/haar lewe het nie, want die insig en impak van die stap wat jou ouers geneem het kom eers later - in retrospek. Dit is dus my doel om te probeer beskryf wat emigrasie na Suid-Afrika aan Nederlandse kinders van emigrante ouers gedoen het en in watter mate die onworteling hulle lewensuitkyk en lewensgang beinvloed het. Het dit 'n soort kultuurloosheid teweeg gebring - 'n gebrek aan tradisies en rituele wat prysgegee word en nie noodwendig met nuwe tradisies en rituele vervang is nie?"